Alatsinainy 30 janoary 2023 — Herinandro Tsotra fahefatra Mandavantaona — Taona tsy ankasa — Aza mba hamafisina ny fonareo anio, fa henoy ny feon’ny Tompo — Evanjely Masina nosoratan’i Masindahy Marka (Mk. 5, 1-20)

Tarihan’i Masindahy Marka isika handinika ny lalana nizoran’i Kristy sy ny fahagagana nataony, izay maneho ny famonjena entiny dia “ny fanafahana ireo miaina ao anatin’ny fangenjana maro isan-karazany, endriky ny fahafatesana sy fisarahana, ho an’ireo lavitra an’Andriamanitra”.

Ny fanasongadinana ity lehilahy azon’ny demony ity, indrindra ireo manjo azy sy ny tsy fahafahan’ny mpiray monina mamolaka azy, dia maneho ny haratsian’ny toe-piainana manjo antsika olombelona voagejan’ny fahotana sy ny fisaraham-bazana aterany amin’ireo miara-monina amintsika. Fa rahefa manompo fahotana isika dia tsy hanam-pahefana amin’ny tenantsika intsony, fa hanaiky azy tanteraka ary handeha amin’izay hitondrany antsika. Diniho ity nanjo an’ilay azon’ny fanahy maloto, fa tsy tompon’ny tenany intsony fa itoeran’ny herin’ny ratsy sady tsy afaka niara-nitoetra tamin’ireo iray tanana aminy akory.

Iza àry, no afaka hamonjy antsika amin’ny asan’ny demony? Iza no manana fahefana handresy ny ratsy ao amintsika? Tsy misy afa-tsy i Kristy, Ilay Zanak’Andriamanitra Avo indrindra. Eo anatrehan’i Kristy mantsy, dia tsy misy hery mahatohitra Azy. Ary Izy irery ihany no afaka hanala ny fatorana sy ny geja, vokatry ny fahotana, misy amintsika olombelona, mba haha olona afaka antsika.

Koa meteza hanatona Azy miaraka amin’izay manjo antsika, meteza hafahany fa ny hamonjy antsika amin’ny haratsiana rehetra, hampiombona antsika amin’Andriamanitra sy hanompoantsika Azy no nahatongavany.