Sabotsy 5 nôvambra 2022 — Herinandro Tsotra faharaika amby telopolo Mandavantaona — Ny teninao, ry Tompo, dia fanahy sy fiainana; Ianao no manana ny teny mahavelona mandrakizay — Evanjely Masina nosoratan'i Masindahy Lioka 16, 9-15

Toa fanohizana ny fanazavana ilay fanoharana mahakasika ilay mpitandrina tsy marina noresahantsika omaly ihany no tantaraina anio, fa saingy mila fanazavana bebe kokoa ny nolazain’i Jesoa amin’ilay hoe : "koa raha tsy mahatoky amin’izay tsy anareo ianareo, iza no hanome anareo izay anareo ?" (Lk 16, 12).

Fa ahoana tokoa moa izany mahatoky amin’ny harena tsy marina izany ? Ary nahoana no lazain’i Jesoa fa azo anankinana andraikitra izany karazan’olona izany, no sady azo antoka fa ho tafiditra any amin’ny fanjakan’ny lanitra ihany koa ?

Ny atao hoe mahatoky amin’ny harena tsy marina dia ny hoe tsy mivadika velively amin’ny fanompoana an’Andriamanitra na dia eo aza ny fakam-panahy mety ho tonga amin’ny fitantanana ny vola sy ny tariny. Izany olona izany dia mendrika ny hampiandraiketana ny fitantanana ny Fiangonana satria hikatsaka mandrakariva ny soa iombonana hatrany ; hitsinjo ireo sahirana hatrany izany olona izany.