Alakamisy 20 ôktôbra 2022 — Herinandro Tsotra fahasivy amby roapolo Mandavantaona — Mahatoky ny lahatrao, ry Tompo, ary mafy orina mandrakizay alaovalo — Evanjely Masina nosoratan'i Masindahy Lioka 12, 49-53

Tonga hanipy afo ety ambonin’ny tany aho, ka akory ity faniriko mba hiretan’izany sahady, hoy i Jesoa. Ny afo ambarany eto dia ilay afom-pitiavany antsika olombelona, ny fitiavany te hamonjy ny olombelona ka nanolorany ny ainy teo ambony hazofijaliana. Ary ny finoana an’i Kristy nitsangan-ko velona dia mitaky fombam-piainana vaovao ka mety hiteraka tsy fifankahazoan-kevitra na dia eo amin’ny samy mpianakavy aza, eny hatrimin’ny mpianaka aza : "moa ataonareo fa tonga hitondra fihavanana ety an-tany aho ? Tsia hoy aho aminareo, fa fampisarahana aza". Marina fa hitondra famonjena no nahatongavany, fa misy ireo minia tsy manokatra ny fony handray ny fampianarany izay mifono izany famonjena hoantsika olombelona izany, ka miteraka tsy fifankahazoana hevitra, tsy manaiky hodiovin’ilay afom-pitiavan’i Kristy ny fombam-piainany.

Ny afo entin’i Kristy mantsy dia afom-pitiavana marina, afo afaka madoro sy mandevina ny fitiavan-tenantsika sy ny avonavona rehetra. Ka mitarika antsika ho amin’ny fiovam-po izany. Ary rehefa manaiky ho diovin’izany afom-pitiavan’i Kristy izany isika dia tonga fitaovana hanadio sy hanasaraka ireo fomba fisainana tsy mety voizin’ny fiaraha-monina ary mitaona ny olona hanaraka ny fomba fisainana kristianina marina. Ny antony mahatonga ny maro amintsika tsy hisy fiantraikany mafy amin'ny fiaraha-monina dia noho ny tsy fahampian'ny fitiavana marina toy izany. Koa managataha ny fahasoavan’i Jesoa Kristy mba handoro ny haratsiana ao amintsika tsirairay avy ka ho afaka hiaina ny fitiavana sy ny fanadiovana, ary fiovam-po marina tokoa isika mianakavy.