Alatsinainy 10 ôktôbra 2022 — Herinandro Tsotra fahavalo amby roapolo Mandavantaona — Ny fitsipikao, ry Tompo, mahafaly ny fo; ny baikonao mazava manilo ny maso — Evanjely Masina nosoratan'i Masindahy Lioka 11, 29-32

Ry kristianina havana ; olona maro manara-dia an’i Jesoa satria nahita fahagagana matetika. Eo indrindra i Jesoa no mampianatra hoe tsy mety mino fa miandry fahagagana foana ; ka raha miandry sy mahita fahagagana vao hoe mino, dia tsy finoana intsony izay fa fahitana. Ny finoana manko dia fitokisana tanteraka tsy mila antoka fa ny fahatokisan’Andriamanitra manambara no antoka ; tsy mila porofo ara-batana fa ny fahamarinan’Andriamanitra dia ampy. Ny fahagagana dia vokatry ny finoana. Tsy lojika mihitsy na mandeha ho azy ny hoe rehefa mahita fahagagana dia mino. Fiekena amin’ny fo no dingana hanombohany.

Ohatra nalain’i Jesoa ho fambara ireo olobe tao amin’ny Tesatamenta Taloha ; na i Salomona mpanjaka lehibe na i Jonasa mpaminany dia samy nahery tamin’ny teniny sy ny asany ; tenin’i Salomona ombam-pahendrena fotsiny aza naharesy lahatra ilay mpanjaka tsy jody, tsy mainka ve fa i Jesoa Fahendren’Andriamanitra. Ny toritenin’i Jonasa indray andro fotsiny aza dia nampibebaka ny mponina tao Niniva, tsy mainka i Jesoa nitory ny Fanjakan’Andriamanitra, i Jseoa Tenin’Andriamanitra.

Tsy nanome famantarana i Jesoa fa nampahatsiahiviny ireo tandindona ireo. Satria raha mahazo ny dikan’ireo dia tonga eo amin’i Jesoa ny fanapahan-kevitra : mino Azy sy manaraka Azy. I Jesoa rahateo no fahatanterahan’ny Testamenta Taloha. Izy no Fahendren’Andriamanitra sy faratenin’Andriamanitra. Izy no lalana tokana mahavonjy. Amen.