Alahady 19 jona 2022 — Ny Vatana aman-dRa Masin'i Kristy — Izaho no Mofo velona izay nidina avy any an-danitra, hoy ny Tompo, izay mihinana amin’ity Mofo ity dia ho velona mandrakizay — Evanjely Masina nosoratan'i Masindahy Lioka 9, 11b-17

Mankalaza ny Vatana aman-dRà Masin’ i Jesoa ny Eglizy anio. Vatana sy Rà izay maka endrika mofo sy divay. Ny Evanjely anio anefa dia mitantara ny fampitomboana ny mofo, izay nataon’i Jesoa mba hanambarany ny Eokaristia.

Mahafantatra ny hanoanana mianjady ho an’izay manara-dia Azy i Jesoa ka niantra azy ireo. Tsy tiany anefa ny miasa irery ka nangataka ireo mpianany izy mba hikarakara azy ireo. Mofo dimy sy hazandrano roa anefa no misy ho an’ireo vahoaka maro izay tonga teo. Niainga tamin’ireo zavatra kely ireo i Jesoa tamin’ny fampitomboana izay nataony. Famantarana izay nialohavana vavaka sy fitsofan-drano an’ireo mofo sy hazandrano nampitomboina, izay vao novakiana sy nozaraina tamin’ny vahoaka. Mampianatra antsika Izy eto mba tsy hiandry hanana ny ampy sy zavatra maro vao mahalala hanolotra ho an’Andriamanitra sy hizara ho an’ny namana. Fa izay misy eo am-pelatanana no entina am-pinoana mba ho tonga asa soa lehibe.

Ny famakiana sy ny fizarana ny mofo eto dia mampahatsiahy antsika ny Eokaristia misy ny vatana aman-dRà masin’i Jesoa izay hankalazaintsika anio. Tsy sakafo ara-batana fotsiny izy io fa indrindra sakafo ara-panahy izay antoky ny fiainana sy ny famonjena. Ny Eglizy tokoa mantsy no manohy sy mandavorary ny Eokaristia ankehitriny. Izy no mampiombona antsika kristianina izay mandrafitra indrindra ny fianakaviam-ben’Andriamanitra.

Tompo ô, enga anie mba hisy vokany eo amin’ny fiainanay manontolo ny Eokaristia Masina izay hankalazainay. Amen.