Zoma 17 jona 2022 — Herinandro faha iraika ambin'ny folo mandavantaona — Sokafy, ry Tompo, ny fonay mba hitandremanay ny tenin-janakao — Evanjely Masina nosoratan'i Masindahy Matio 6, 19-23
Nambara tamintsika omaly, fa tsy afaka ny tsy hifandray amin'Andriamanitra isika. Nohariany mba ho azy ka mila miraiki-po aminy tanteraka. Ny Evanjely anio indray dia manambara fa mila mikatsaka azy Andriamanitra, harena ambony sy sarobidy indrindra mandrakizay, isika.
Mizotra mankany amin'Andriamanitra ity fiainantsika ity, ary tsy fiainana mandeha ho azy anefa fa fiainana katsahina isan'andro, fiainana efa santarina amin'ny alalan'ny fanehoantsika fa manjaka tatnteraka ao am-po sy amin'ny fiainana Andriamanitra, mambomba ny ataontsika ary miara-monina eo anivontsika.
Tsy ny rehetra anefa no afaka hiaina izany, tsy ny rehetra no mahatsapa fa harena ambony mahasambatra Andriamanitra. Fa isika mino azy ary mandeha am-pahitsiana eo anatrehany no tokony hankato azy Andriamanitra mandrakariva. Ary ho antsika kristianina, indrindra indrindra, dia ny feon'ny fieritreretana na ny "conscience" no maso mijery sy jiro manazava ny ataontsika. Ao Andriamanitra no miteny amintsika mba hanaovantsika izay sitrany sy mahafaly azy.
Mila diovina io kônsiansy io, mila beazina sy kolokoloina satria hoy i Kristy hoe : "Ny maso no jiron'ny tena, raha tsara ny masonao dia hazava avokoa ny tenanao rehetra".
Voafidin'Andriamanitra isika, voatokana ho azy ka tokony hikatsaka sy hampanjaka azy. Katsaho Andriamanitra, dia hanana anjara amin'izay ananany isika ary handova ny fanjakany.
