Zoma 13 mey 2022 — Herinandro fahefatra fankalazana ny Paka — Nitsangan-ko velona i Kristy, ka tsy maty intsony, tsy manan-kery aminy intsony ny fahafatesana — Evanjely Masina nosoratan'i Masindahy Joany 14, 1-6
Tandindonim-pisarahana ny mpianatr’i Jesoa ka malahelo sy mitebiteby ; fa vao mainka mapitebiteby lavitra noho izany fisarahana ara-batana izany ny hoe mbola ho tafahaona any amin’ny mandrakizay ve. Eo indrindra i Jesoa no mampitraka azy ireo hoe : tena misy ny lanitra, tena misy ny fiainana mandrakizay ; ka rehefa tapitra ny eto an-tany dia fonenana any an-tranon’ny Ray ; ary izy Kristy mihitsy no manomana izany ho an’izay rehetra mino azy. Ny atao hoe finoana dia fitokisana fa marina Andriamanitra mamonjy.
Mety tsy ho tonga vetivety amin’ny finoana ny olona rehetra. Na ny efa mino aza mety holalovan-drahona ny finoana ka hisalasala tampoka. Fampianaran’ireo olomasina zokintsika amin’ny finoana dia hoe : amin’ny fotoana rehetra sy amin’ny zava-mitranga rehetra dia antsoy lalandava ny anaran’i Jesoa Kristy.
Fanambarana lehibe iray ity lazain’i Jesoa eto : "Izaho no lalana sy fahamarinana ary fiainana ; tsy misy mankany amin’ny Ray afa-tsy amin’ny alalako". Izay no vokatry ny safidy, izay no hiafaran’ny finoana : izay misafidy miaraka Aminy eto an-tany dia hiaraka Aminy hatrany amin’ny mandrakizay. Amen.
