Sabotsy 01 febroary 2020 — Herinandro fahatelo mandavantaona — Evanjely Masina nosoratan'i Masindahy Marka 4, 35-40 — Ampianaro ahy, ry Tompo, ny làlanao; ary tariho ho amin'ny làla-mahitsy aho.
Ny andro efa hariva no niteny i Jesoa: "Andeha isika ho eny andafin-drano". Eny fa na mpanarato àry ny ankamaroan'ny mpianatr'i Jesoa dia fantatra fa ny tahotra ny ranomasina dia manjohy ny Jody mandrakariva. Manamafy izany ny Salamo 28, noheverina fa fitoeran'Ilay Ratsy mantsy ny ranomasina. Eo indrindra i Jesoa no mitaona azy ireo, sady mitsapa ny finoany: avy amin'ny toerana iray hamakivaky ny ranomasina ho eny andafin-drano. Hamakivaky ilay heverin'izy ireo fa herin'Ilay Ratsy ary manampy izany ihany koa ny andro alina.
Tanteraka tokoa ny ahiahy, nandrivotra sady nanonja ny ranomasina, nila ho fefika ny sambo, i Jesoa anefa matory. I Jesoa indray no lasa fototry ny ahiahy noho ny tsy fahatokisan-tena sy noho ny fitavan-tena: "tsy mampaninona anao ve raha maty izahay?" Naneho ny fahefany i Jesoa, izay fampianarana lehibe ho an'ireo niara-niondrana taminy: nampitony ny ranomasina sy ny rivotra Izy. I Jesoa no miara-dàlana miara-miondrana tamin'izy ireo nefa ny tahotra no nameno ny fony ka tsy afaka natoky, tsy afaka nino izy ireo.
"Tsy mbola manam-pinoana ihany va ianareo?" Eo amin'ny fiainantsika mamakivaky onja, ary zary lasa toa efitra aza dia miara-dàlana amintsika i Jesoa. Ny finoana no angatahany amintsika miaraka aminy dia ho tody eny andafin-drano isika eo amin'ny fiainana andavanandrontsika. Koa angataho i Jesoa hamelombelona mandrakariva ny finoantsika.
