Alarobia 30 marsa 2022 — Herinandro fahefatra amin'ny Karemy — Toy izao no nitiavan’Andriamanitra an’izao tontolo izao: nomeny ny Zanany Tokana; ka hanana ny fiainana mandrakizay izay rehetra mino Azy — Evanjely Masina nosoratan'i Masindahy Joany 5, 17-30

Ity Evanjely ity no anehoan’i Kristy ny fifandraisana sy fiombonana lalina misy ao aminy sy ny Ray. Anisan’izany ny asa ataony, izay asan’ny Ray ihany koa. Miasa Andriamanitra mba hahavonjy ny olombelona sy hiombonany fahasambarana aminy, araka ny nahariany azy hatrany am-piandohana.

Rava sy simba noho ny fahotana mantsy io fahasambarana teo amintsika olombelona io. Ka raha mbola misy koa ny atao hoe : mpanota, raha mbola misy koa ireo voatariky ny ratsy ary miaina ao anatin’ny fahotana dia miasa i Kristy.

Tsy misy afa-miteny hoe marina eo anatrehan’Andriamanitra isika fa mpanota avokoa, ary isika indrindra no iasan’i Kristy, satria tsy tiany ho very. Aza atao very maina ny asany. Miombona aminy ary manaraha azy fa ny nijaliany sy ny nahafatesany ary ny nitsanganany ho velona no nandreseny ny haratsiana sy ny fahotana ka nahazoantsika fiainam-baovao mahasambatra miaraka aminy.