Alarobia 16 marsa 2022 — Herinandro faharoa amin'ny Karemy — Ny Teninao, ry Tompo, dia fanahy sy fiainana; Ianao no manana ny teny mahavelona mandrakizay — Evanjely Masina nosoratan'i Masindahy Matio 20, 17-28

Asain’i Jesoa handinika ny antony mahatonga antsika ho kristianina isika araka ny Evanjely izay novakiana tamintsika teo. Mazava avy hatrany ny valintenintsika fa hoe : "noho ny faniriantsika hanara-dia an’i Kristy no antony maha kristianina antsika". Koa toy izao àry ny làlana tokony hizorana raha te hanara-dia an’i Kristy isika : mila mandray anjara amin’ny asa nanirahan’ny Ray Azy, dia ny fitoriana ny Vaovao Mahafaly avy eo mila ny fandraisana anjara ihany koa amin’ny fahoriany sy ny fijaliany. Ireo ihany no nampanantenain’i Kristy antsika.

Indrisy anefa fa maro amintsika kristianina no manova izany làlana izany. Ao tokoa ireo nifindran’ny otrik’aretina nahazo an’ireo roa mirahalahy zanak’i Zebede ka mihevitra fa ny fanarahan-dia an’i Jesoa dia ny fandraisana anjara amin’ny voninahiny (hipetraka eo ankaviany sy eo ankavanany). Tsy fantatr’izy ireo fa miankina be dia be amin’Andriamanitra Ray izany valisoa izany. Koa asaina àry isika mianakavy mba hangataka amin’Andriamanitra ny fahasoavany hahafahantsika hiatrika ireo olana vokatry ny fanatanterahana ny asam-pitoriana fa tsy handinika sahady ilay valin-kasasarana avy hatrany.