Zoma 21 janoary 2022 — Herinandro faharoa mandavantaona — Efa nataoko hoe sakaiza ianareo, hoy ny Tompo; satria efa nambarako taminareo avokoa izay rehetra reko tamin’ny Ray — Evanjely Masina nosoratan'i Masindahy Marka 3, 13-19

Nifidy roa ambin’ny folo lahy i Jesoa mba hiaraka Aminy sy hanara-dia Azy akaikikaiky kokoa. Izay tiany no nantsoiny sy nofidiny. Ary ny antso dia tsy miaraka fa manokana, izay no nahatonga azy eto nantsoiny tamin’ny anarany tsirairay avy. Noho izany, tsy an-tery ny fanarahan-dia an’i Jesoa ho azy roa ambin’ny folo lahy fa an-kalalahana ny famaliana izany am-pitiavana izany. Samy manana ny toetra sy ny maha izy azy tsirairay avokoa izy ireo, nefa dia nampiombonin’i Jesoa tamin’ny fanarahan-dia Azy. Hita tokoa àry eto fa tsy misy ny fiombonana raha tsy misy ny fahasamihafana.

Ny antson’Andriamanitra ho azy ireo ary dia fanomezana avy any Aminy ihany ary mitaky asa. Mitohy hatrany izany antso izany ao amin’ny Eglizy amin’ny alalan’ireo pretra sy relijiozy. Antsoina izy ireo mba hiaina hiaraka amin’i Kristy amin’ny alalan’ny vavaka sy hitory ny tenin’Andriamanitra araka ny sehatra misy azy ireo tsirairay avy ary hitondra fanasitranana ho an’ny olona.

Olombelona tokoa àry araka izany no nofidin’i Jesoa mba hanohy ny asany ; olombelona manana ny heriny sy ny fahalemeny. Nefa ny fahasoavan’Andriamanitra dia manenika ny fiainan’izy ireo mandrakariva mba hamaliany ny antso miantefa aminy.