Talata 18 janoary 2022 — Herinandro faharoa mandavantaona — Raiso ny tenin’Andriamanitra; tsy ho toy ny tenin’olombelona anefa fa araka ny marina tokoa, ho tenin’Andriamanitra — Evanjely Masina nosoratan'i Masindahy Marka 2, 23-28

Mitohy ihany eto ny tsikera atao amin’i Jesoa. Eto dia mahakasika ny fiotazam-bary amin’ny andro Sabata izay nataon’ireo mpianany no nanakianan’ireo Farisianina Azy.

Nazavain’i Jesoa tamin’izy ireo àry ny momba ny Sabata izay nifototra tao amin’ny Testamenta Taloha mahakasika an’i Davida Mpanjaka sy ireo mpanara-dia azy. Ambaran’i Jesoa amin’izany fa ny Sabata dia nataon’Andriamanitra mba ho tombotsoan’ny olombelona : ny fakana aina sy ny fiderana an’Izy Andriamanitra ihany. Noho izany, dia ambony noho ny Sabata ny maha-olona, Fa ny fahafatarantsika an’izany Sabata izany dia tsy tokony hijanona fotsiny amin’ny hoe fialana sasatra fa indrindra koa hoe fiderana an’Izy Andriamanitra.

Ho an’ny Jody mantsy, dia ny hialana sasatra amin’ny andro Sabata dia mba hahafahana midera an’Andriamanitra irery ihany. Avela daholo ny asa aman-draharaha hany ka ny hanina hohanina amin’andro Sabata ary dia ahandroina mialoha an’io andro io. Ny fanaovana zavatra ankoatra izay dia midika tsy fitandremana ny andro Sabata ho azy toy ny nataon’ireto mpianatr’i Jesoa ireto.

Novalin’i Jesoa àry fa "ny Sabata dia natao ho an’ny olona fa tsy ny olona no ho an’ny Sabata". Ary mamporisika mihitsy àry Izy fa ny Sabata dia natao ho fanaovana soa fa tsy ratsy ary ny mamonjy aina fa tsy ny mamono. Mbola ho hitantsika rahampitso moa ny Evanjely mahakasika an’izany. Koa eto, ny fiotazam-bary izay nataon’ireo mpianany dia famonjena aina.

Araka izany, ny Zanak’olona no tompon’ny Sabata satria Izy dia Andriamanitra, ka nanome antsika ny fomba hiainana amin’izany ao anatin’ny toerana sy ny fotoana.