«Olon’ny fanantenana sy ny hafaliana ny Relijiozy. Mila mijoro ho fanasina mandrakariva ianareo”, hoy Mgr Odon Marie Arsène Razanakolona, tamin’ireo relijiozy teto amin’ny Arsidiosezin’Antananarivo tonga nirary soa azy ireo ny sabotsy 28 desambra 2019 tao amin’ny Sekoly Maria Manjaka, tantanin’ny Fikambanan’ny Masera Saint Joseph de Cluny.
Zava-dehibe izany, indrindra manoloana ny tontolo sy vaninandro diavintsika izao satria maro ny olona no manaotao foana, indrindra ny tanora. Mpiara-miasa amin’ny eveka ny relijiozy amin’ny asam-pamonjena. Ilaina ny hirotsahan’ny Relijiozy tsy mihiboka amin’ny asam-pamonjena eo ambany fitarihan’ny eveka. Ireo sasany anisan’ny fikambanana, na lahy na vavy, dia tena anatin’ny fianakaviamben’ny diôsezy koa ary sarobidy tokoa ny fanampiana omen’izy ireo ny eveka (Sori-dalana momba ny Adidy maha-Mpiandry ondry ny Eveka ao amin’ny Fiangonana « Christus Dominus », n° 34). Ny eveka no Raiamandreny iombonana eo amin’ny diôsezy iray. Ary miara-miasa aminy akaiky koa, ny eveka mpanampy raha misy, sy ny vikera jeneraly. Ho an’ny diôsezin’Antananarivo manokana, dia ahitana ireo sokajy telo ireo : Mgr Odon Marie Arsène Razanakolona, Arsevekan’Antananarivo ; i Mgr Jean Pascal Andriantsoavina, eveka mpanampy azy ; ary i mompera Ludovic Rabenatoandro, Vikera Jeneraly.
Raha eo amin’ny lafiny ara-pastôraly no jerena dia hita taratra fa mifanome tànana sy miara-misalahy amin’ny mpiandry ondry tokoa ny Relijiozy eto amin’ny Diosezin’Antananarivo. Mivombona ao amin’ny UDRA « Union Diocésaine des Religieux et Religieuses d’Antananarivo ». Miisa 255 ankohonam-piainan-dRelijiozy raha ny antontan’isa tamin’ny taona 2018-2019. Tsapa fa manatanteraka ny iraka sy asam-pamonjena nankinin’i Jesoa Kristy aminy izy ireo eo anivon’ny diôsezy. Tsy vitan’ny miasa araka ny fanomezam-pahasoavana nomena ny fikambanana tsirairay avy ireo relijiozy maro be eto amin’ny Diôsezin’Antananarivo ireo, fa tena miombona ihany koa amin’ny maha-olom-boatokana hanara-dia an’i Jesoa Kristy akaiky kokoa.
Misy fikambanana mpandrindra na antsoina hoe birao mpitantanaio fiombonan’ny relijiozy io, ka mandritra ny telo taona ny faharetan’ny fitantanana. Nanomboka tamin’ny taona pastôraly 2019-2020 hatramin’ny taona 2021-2022 ka ny Fikambanana Salezianin’i Don Bosco no filoha, Maseran’ny Filles de la charité no filoha lefitra, Maseran’ny Servantes de la Visitation sy ny Fikambanan’ny Redemptoristes no mpitantsoratra ; Maseran’ny Fransciscaines Missionaires de Notre Dame sy ny Maseran’ny Sainte Thérèse d’Avesnes no mpitam-bola.
Fomba fanao ny UDRA ny fifampiarahabana sy ny fifampirariana soa rehefa tono-taona toy izao. Eo ihany koa ny fiarahabana ireo raiamandreny ka natomboka tamin’ny alalan’ny Sorona masina notarihin’i Mgr Odon Marie Arsène Razanakolona, Arsevekan’Antananarivo, notronin’i Mgr Jean Pascal Andriantsoavina, Eveka mpanampy azy sy i mompera Ludovic, Vikera Jeneraly, ary ireo pretra maro avy amin’ny fikambanana samihafa.
Nasongadin’i Mgr Odon nandritra ny toriteniny maha-sarobidy ny fiainana maha-Relijiozy : « Olon’ny fanantenana sy ny hafaliana ianareo Relijiozy ». Mila mijoro ho fanasina mandrakariva, hoy izy, indrindra manoloana ny tontolo sy vaninandro diavintsika izao satria maro ny olona no manaotao foana, indrindra ny tanora.
Nambarany ihany koa fa miraki-pahatsiarovana ho azy ny ity daty ity satria ny 28 desambra 1975 no nanamasinana azy ho pretran’i Jesoa Kristy. Mangata-bavaka ho izy mba hambinin’Andriamanitra hatrany izy amin’ny adidy masina iantsorohany, sy mba ho tratry ny 45 taona maha-pretra amin’ny taona ho avy.
Taorian’ny Sorona masina ny fifampirariana soa sy fifampizarana ny hafaliana araka izay efa nomanin’ny fikambanana tsirairay avy, nialohavana ny fanolorona ny solom-bodiakohon’ireo raiamandreny : Mgr Odon, Arsevekan’Antananarivo, i Mgr Jean Pascal, Eveka mpanampy, i P. Ludovic, Vikera jeneraly, i P. Jean Romain, Aomônie ny Relijiozy eto amin’ny diôsezy ary i P. Richard, Aomônie faharoa. Nitondra tenin’ireo relijiozy i P. Mamy Augustin Raheriarisoa, sdb, filohan’ny UDRA amin’izao fotoana izao. Nanafana ny lanona ny masera “junioristes” sy ireo tovovavy eo an-dalam-piofanana.
Isaorana an’Andriamitra fa noho ny fahasoavany nahatontosa iny lanonana iny. Ny irariana dia ny hahatanterahan’ilay vavak’i Jesoa hoe « Mba ho iray anie izy rehetra » (Joany 17, 21). Hiombona sy hifankatia anie ny relijiozy eto amin’ity Arsidiôsezin’Antananarivo ity.
Mompera Mamy, SDB
