Resy lahatra amin'ny maha zava-hehibe ny famokarana ara-biôlôjia, ireo tantsaha miara-miasa amin'ny fikambanana Tsiky Tsika, ato amin'ny Faritra Analamanga. Isan'izany Rabadaoro Tsimatahomanana, monina ao amin'ny Fokontany Soanavela, Kaominina Fihaonana, Disitrikan'Ankazobe.

Nahasarika ity tantsaha ity amin'ny fanentanana ny tantsaha ao amin'ny tanàna misy azy ny fandraisana anjara amin'ny fampandrosoana amin'ny alalan'ny fanovana ny fomba nahazatra hatramin'izay, amin'ny famokarana atao. Izany dia mba hananana fomba fijery vaovao miompana amin'ny fampandrosoana ny fiaraha-monina sy ny fikolokoloana ny tontolo iainana. Fomba vaovao ahafahana miatrika ny fiovaovan'ny toetr'andro misy ankehitriny.

Tsy mora anefa ny miova amin'ny mahazatra, hoy ity tantsaha fitaratra, ao amin'ny Kaominina Fihaonana ity, saingy rehefa ilofosana dia ahitam-pahombiazana. Maro ny tombon-tsoa azo amin'izany. Ankoatra ny fihatsaran'ny fidiram-bola, ny ara-pahasalamana no isan'ny fiovana lehibe amin'ny famokarana ara-biôlôjia, hoy i Rabadaoro Tsimatahomanana. Toa izany koa ny tombon-tsoa hafa toa ny fitsitsina ny rano sy ny angovo ampiasaina.