Mandrava ny voly, seha-piveloman'ny tantsaha ny bibikely mpanimba voly tato ho ato. Velon-taraina ny mpamboly any ambanivohitra manoloana izany. Hirika iray ahafahana miady amin'izany no entin'i Papa Bio, na Ranaivoarison Basile.

Isan'ny tantsaha niaina ny fahavoazana nateraky ny bibikely mpanimba voly i Papa Bio. Nisy lolo fotsy mpanimba voly mantsy, ny voankazo nambolen'i Papa Bio teo amin'ny sahany. Natao ny fomba samihafa namonoana azy ireny, fa ezaka very maina ny azy, hoy i Papa Bio.

Nikaroka hevitra hafa àry i Papa Bio, ka tamin'ny alalan'ny fikarohana no nahitany fa misy taharo, poizina mamono bibikely mpanimba voly, ao anatin'ny mangahazo. Mandalo dingana maro anefa ny fikarakarana, vao azo izany singa izany, ary izay no akora hamonoana ireo bibikely mpanimba voly samihafa ireo, hoy i Papa Bio.

Mahomby ny singa azo avy amin'ny mangahazo, hamonoana ny bibikely mpanimba voly, saingy manampy izany koa ny fampiarahana azy amin'ny fampiasana zezika kankana. Hirika azon'ny tantsaha atao tsara ny mamokatra azy.