Nankalaza ny andron'ny 8 marsa, andro iraisam-pirenena ho an'ny zon'ny vehivavy ny teto Madagasikara. Maro ny hetsika nanehoana izany. Nanasa vehivavy tompon'andraikitra, misehatra amin'ny fampandrosoana ny tontolo ambanivohitra ny fandaharana HIRIKA. Tsy iza fa Ramatoa Tantely Rahoeliarivahy Rajobson...
Ramatoa Tantely Rahoeliarivahy Rajobson, Filoha mpitarika ny Fédération de Dirigeants et Entrepreneurs Madagascar (FEDEM) ; manam-pahaizana manokana momba ny kaonty (expert comptable), mpanara-maso ny kaonty any amin'ny orinasa (commissaire aux comptes), nahazo ny diplaoma momba izany tany Paris-France, mpampianatra sy mpampiofana ihany koa izy.
Niasa nandritra ny taona maro tany ivelany saingy nahatsapa fa manana adidy ho an'ny firenena dia ny fanampiana ny tantsaha mpiray tanindrazana, ka nitodi-doha teto an-tanindrazana. Nanangana ny FEDEM izy sy ireo namana mpiara-miasa aminy ny taona 2021 ahafahana manatratra izany vina izany.
Miasa amin'ny Faritra telo eto amin'ny nosy manohana ny asa famokaran'ny tantsaha ny FEDEM, dia ny ao Anjozorobe eto Analamanga, ny any Bongolava ary ny ao Vakinankaratra. Manofana ny tantsaha hahay hitantana ny asa famokarana no iraka tanterahana. Manofana ny tantsaha hahafolaka ny teknikam-pambolena ihany koa.
