Tsy tratra ny tanjona napetraka tamin'ny drafim-pirenena fampandrosoana ny fambolem-bary na ny SNDR tamin'ny taona 2016-2020. Tsy nihoatra ny 4% isan-taona ny tahan'ny famokarana teto amintsika izay tsy mifanalavitra amin'ny tahan'ny fitombon'ny mponina hoy ny ministry ny fambolena sy ny fiompiana, Ramilison Harifidy.

Maherin'ny 90% ny mponina mipetraka any ambanivohitra dia mivelona amin'ny resaka fambolena avokoa ary manao ny vary ho foto-tsakafo. Fanambin'i Madagasikara noho izany ny hiady amin'ny tsy fanjarian-tsakafo sy ny hanatratra ilay tanjona ho sopitry ny ranomasimbe indiana sy hanondrana vary hatrany Afrika. Manana paik'ady mazava hiatrehana ny fampitomboam-bokatra ny Fanjakàna araka ny fanazavan'ny ministry ny fambolena sy ny fiompiana.
Isany antony tsy nahatratrarana io tanjon'ny drafim-pirenena ho an'ny fambolem-bary na ny SNDR io araka ny fanazavana ny fitombon'ny mponina, ny fahanteran'ireo foto-drafitr'asa famokarana, ny fiovaovan'ny toetry ny andro, ny fisian'ny valan'aretina maneran-tany, ny loza voajanahary...
Natao ny 12 mey lasa teo ny atrikasa fanavaozana sy fanatsarana ny drafim-pirenena fampandrosoana ny fambolem-bary. Nikarakara ny ministeran'ny fambolena sy ny fiompiana niarahana tamin'ireo mpiara-miombon'antoka toy ny JICA sy ny CARD.