Manimba ny tontolo iainana indrindra fa ny faritra mando manodidina ny farihin'Alaotra ny faharavan'ny zetra manodidina azy. Velom-panahiana ireo mpandala ny fiarovana ny zava-boahary fa tsy ho hita ao Alaotra intsony ny zetra raha mbola mitohy ny fanimbana azy...

43 000 Ha eo ho eo i Alaotra ka ny 23 000 Ha amin'izay no zetra, dia ny faritra misy rano ahitana zozoro, bararata ary zava-maniry an-drano samihafa. Manana anjara toerana lehibe amin'ny fiarovana ny farihy ny zetra. Miaro ny antsanga sy ny riaka tsy hiditra ao amin'ny farihiben'Alaotra.

Noho ny filana tanimbary nefa dia manomboka rava tsikelikely ny zetra, misy mandoro havadika ho tanimbary. Maro ny karazan-java-maniry sy ny biby no efa tsy hita intsony vokatr'izany. Tandondomin-doza ihany koa ny lalam-pihariana jono mampalaza an'Alaotra...

Manana anjara toerana lehibe amin'ny fiarovana ny tontolo iainana ao Alaotra ny zetra ka tsy tokony ho potehina hoy Andriamatoa Laingontsoa Andriamasinoro. Mila fandraisana andraikitra ny tsy haharava ny fiharian'ny mpanjono ao amin'ny farihin'Alaotra amin'ny alalan'ny fiharovana ny zetra hoy hatrany izy.

Mila mitovy hevitra noho izany ny rehetra amin'ny fiarovana azy io satria misy ireo mahatsapa ny mahasarobidy azy ka miaro izay manandrify azy. Ny hafa kosa mirona any amin'ny famadihana azy ho lasa tanimbary. Raha izay nefa no mitranga dia tandondomin-doza ny farihiben'Alaotra.