Alakamisy 12 aogositra 2021 — Herinandro fahasivy ambin'ny folo mandavantaona — Izay mitandrina ny didin’i Kristy no manana ny fitiavana an’Andriamanitra lavorary ao aminy tokoa — Evanjely Masina nosoratan'i Masindahy Matio 18, 21 — 19, 1

Mifototra indrindra amin'ny Famindram-po, hahatsapantsika ny haben'ny fitiavana tsy misy fetra, ny fampianaran'i Kristy anio. Izay tia, vonon-kamela. Mariky ny fitiavana, toy ny itiavan'Andriamanitra antsika izany : tsy misy fetra fa mamela ny hadisoan'izay mangata-pamelana aminy. Indrafo miteraka famindram-po anefa fa tsy zavatra mijanona ho an'ny tena fotsiny. Io no tohin'ny tenin'i Kristy momba ny fanoharana nambarany, tamin'ny Evanjely nohenointsika teo : hahaizantsika mangoraka sy maneho hatsaram-po sy fitiavana an'ireo diso tamintsika. Samy mpanota isika, samy tsy mendrika eo anatrehan'Andriamanitra, ary samy mila ny indrafony ka tokony hifamela. Fa sady fiainana ny fahasoavana raisina amin'ny kônfesy ataontsika, no mandrindra ny fifandraisantsika samy isika. Izay ataontsika amin'ny hafa no hasetrin'Andriamanitra antsika koa.

Angataho Andriamanitra, hanampy sy hitari-dalana antsika tsy hitoetra ao anatin'ny fahotana sy ny haratsiana, ary enga anie tsy hohadinointsika fa ny indrafon'Andriamanitra no mahatonga antsika ho mpamidra fo koa amin'ireo namantsika.