Alakamisy 14 janoary 2021 — Herinandro voalohany mandavantaona — Ampianaro ahy, ry Tompo, ny lalanao, ary tariho ho amin’ny lala-mahitsy aho — Evanjely Masina nosoratan'i Masindahy Marka 1, 40-45

Ry kristianina havana ! Fantatsika tsara ny aretina habokana fa ratsy ary mamindra. Ireo olona voan’io aretina io dia atoka-monina satria toy ny maloto ka tsy tiana handoto ny olona na hamindra amin’ny hafa. Ny aretina moa ao amin’ny Baiboly dia heverina ihany koa ho toy ny fahotana ka anisan’ny hitalahoana famindram-po amin’Andriamanitra ny hahasitrana azy. Ny aretina mbola sedraintsika amin’izao fotoana izao, dia io Coronavirus io, tsy maintsy atoka-monina izay olona voany. Nanatona an’i Jesoa anefa ity boka ity nangataka ho sitraniny ka sitrana. Finoana no nanosika azy, ary finoana narahina dingana nanatona. Efa noresahantsika teto omaly ny mahakasika izay fifanatonana izay mba hahatanteraka ny famonjena antsika. Tsy afaka manatona olona hafa isika raha voan’ny aretina Covid-19, nefa tsy manakana antsika kosa izany hivavaka, hitalaho fahasitranana amin’i Jesoa ary raha manana finoana sy fahatokisana isika dia manasitrana antsika Izy.

Fandrentsika matetika ao amin’ny Evanjely koa io fandraran’i Jesoa an’ilay boka sitrana io hoe aza milazalaza na amin’iza na amin’iza. Izany ilay tsiambaratelon’ny maha Mesia Azy, izay tsy tiany aseho raha tsy tafatsangan-ko velona Izy. Izy anefa milaza hoe mandehana miseho amin’ny mpisorona ary mandidy hanolotra fanatitra ho mariky ny fahasoavana azo sady fisaorana an’Andriamanitra. Mampianatra antsika i Jesoa fa na inona na inona fahagagana sy fahasoavana entin’Andriamanitra amintsika eo amin’ny fiainana dia tokony isika hanaja mandrakariva ny fitsipika sy ny lalàna mifehy ny fiaraha-monina, na firenena, na Fiangonana. Fanajantsika izany lalàna izany ny fanolorana fanatitra andidian’i Jesoa ilay boka sitrana hatao eto. Ry kristianina hava-malala, ny Eokaristia anasan’ny Eglizy antsika mba ho vonjentsika isan’andro na farafaharatsiny isan-kerinandro dia fanehoantsika izay fankasitrahana an’Andriamanitra noho ny fahasoavana omeny antsika izay. Aza raisina amin’ny maha didin’Andriamanitra azy fotsiny io, na dia anisan’ny lalàna azy, fa raiso ho toy ny fisaorana mandrakariva avy ao am-po satria soa sesehena isan’andro no omeny antsika. Fahalalam-pomba tsara ary toetra mendrika ny fahaizana mankasitraka koa misaora an’Andriamanitra lalandava.

Ny rariny ho fampivoarana ny marefo

Arahanao amin'ny rakitsary eto ny firarian-tsoa avy amin'i Mgr Désiré Tsarahazana. "Raha tiantsika ny ho sambatra, dia tsy maintsy mampanjaka ny marina isika", hoy i Mgr Désiré Tsarahazana tamin’ny firarian-tsoa nataony ho an'ny Malagasy amin’izao Noely izao. Tia antsika rehetra tsy an-kanavaka Andriamanitra, noho izany dia tokony hifanaja sy hanampy ary hiaro ireo marefo indrindra.

Tohiny...

Sady mpanabe no mpitory Vaovao Mahafaly

Ry havana, migadona ity ny taona vaovao 2021. Koa amin’ny anaran’ny Fikambanana Salezianin’i Don Bosco eto Madagasikara sy ny Nosy Maorisy izay eo ambany fitantanako, no iarahabako antsika mianakavy Tratry ny Taona. Mirary ny soa sy ny tsara ary ny fahombiazana ho an’ny isambatan’olona sy isan-tokantrano.

Tohiny...

Entanin'ny fanantenana isika

Nivoaka tamin'ny 29 desambra 2020 ny fanazavana ofisaly ny teny fanentanan'i P. Ángel Fernández Artime, Recteur Majeur, ho an'ny taona 2021, mitondra ny lohateny ho : "Entanin'ny fananteanana isika : indro havaoziko ny zavatra rehetra" (Ap 21,5). Efa  nadika amin'ny fiteny dimy samihafa izy io: italianina, anglisy, espanola, portogey ary frantsay.

Tohiny...