Tsy tratra ny tanjona napetraka tamin'ilay drafi-pirenena ho fampandrosoana ny fambolem-bary na ny SNDR, tamin'ny taona 2016-2020. Tsy mihoatra ny 4% isan-taona ny tahan'ny famokarana eto amintsika, izay tsy mifanalavitra amin'ny tahan'ny fitombon'ny mponina, hoy ny Minisitry ny Fambolena sy ny Fiompiana, Ramilison Harifidy.

Maherin'ny 90%-n'ny mponina mipetraka any ambanivohitra dia mivelona amin'ny resaka fambolena avokoa, ary manao ny vary ho foto-tsakafo. Fanambin'i Madagasikara noho izany, ny hiady amin'ny tsy fanjarian-tsakafo sy ny hanatratra ilay tanjona ho sompitry ny Ranomasimbe Indianina sy hanondrana vary hatrany Afrika. Manana paik'ady mazava hiatrehana ny fampitomboam-bokatra ny fanjakana, araka ny fanazavan'ny Minisitry ny Fambolena sy Fiompiana.

Isan'ny antony tsy nahatratrarana io tanjon'ny drafi-pirenena ho an'ny fambolem-bary na SNDR io, araka ny fanazavana, ny fitomboan'ny mponina, ny fahanteran'ireo fotondrafitr'asa famokarana, ny fiovaovan'ny toetry ny andro, ny fisian'ny valan'aretina maneran-tany, ny loza voajanahary...

Natao ny 12 mey 2022 lasa teo ny atrikasa fanavaozana sy fanatsarana ny drafi-pirenena fampandrosoana ny fambolem-bary. Nikarakara izany ny Minisiteran'ny Fambolena sy ny Fiompiana, niarahana tamin'ireo mpiara-miombona antoka toy ny JICA sy ny CARD.